六月中跟Swing做過復出訪問，興奮還興奮，當時他們已經做完的歌，不足3首。不經不覺兩個半月過去，突然又說已經做好晒10首歌，9月中就會出碟。Eric Kwok說做碟過程順到好似整定一樣，天時地利人和全部有齊，又講到今次所有歌都是Eric同Jerald一齊作曲，他們又嚟料喇。
Jerald：「以後每首歌都會一齊作，唔會番轉頭喇！」
Eric：「真係唔會番轉頭咩？」
Jerald：「我唔想囉，如果你要做自己嘢，solo都可以啦。」
Eric：「如果我係都要你唱我啲歌呢？」
Jerald：「咁咪做Eric Kwok featuring Jerald咁囉！冇所謂啦，我就你！」
這兩個人，講說話時都不知邊句真，但音樂不會騙人，既然他們已經起貨，我們就驗驗貨吧！
〈我有貨〉
曲：Eric Kwok / Jerald 詞：陳詠謙
Jerald：「我們解散前有首〈大大公司〉，講公司結業，到最後一天仍然是顧客至上，以禮待人，今次這首〈我有貨〉就講Swing復合了，大大公司重開，至於曲式是〈大大公司〉和〈Shut Up〉的合體。」
〈Let It Go〉
曲：Eric Kwok / Jerald 詞：林寶
Eric Kwok：「是第一首我們一齊作的歌，歌詞想講有幾種人很適合叫他let it go的，像容易妒忌的人，或者曾經有事放不低而內疚，或者懷才不遇的。（你說Jerald？）不是，但他全部都有。」
〈麵包生命〉
曲：Eric Kwok / Jerald 詞：黃偉文
Jerald：「作的時候是諗住要有一首慢的有感情的歌，讓公司有大眾化的歌可以交功課，在我的準則來說未試過唱咁pop的歌，已是極限。Wyman的詞我們很鍾意，因為不是情歌詞，類似〈大大公司〉用物件主導。」
〈讓左腳先行一步〉
曲：Eric Kwok / Jerald 詞：陳詠謙
Eric Kwok：「叫人每日不要像機械人般過活，只要做少少事就可以好新鮮，例如你平時每次第一步都是踏右腳，不如今日試試用左腳先，或者平時刷牙永遠是刷左邊開始，今日不如刷右邊先，你會發覺生命突然有一點不同。有時不一定要去到希臘才看到新嘢，在生活中添加一些創意就可以冇咁悶。」
〈點止兵兵〉
曲：Eric Kwok / Jerald 詞：林若寧
Eric Kwok：「世界上很多問題都可以解決，為何到今時今日都未解決呢？就是因為we want to。溫室效應、打仗、饑荒、金融海嘯等，如果全世界人都可以下定決心解決，一定解決到，仲未解決係因為we want to。」
〈尿牀的啟示〉
曲：Eric Kwok / Jerald 詞：陳詠謙
Jerald：「最後作的一首，陳詠謙的詞講瀨尿，你有沒有試過夜晚急尿發夢去廁所？我好細個試過，真係瀨咗，首歌想講生命中很多事在夢裡發生就夠了，現實中發生就會瀨嘢。（Eric有試過嗎？）成日試，瀨屎都試過啦！」
〈Hehehe〉
曲：Eric Kwok / Jerald 詞：林寶
Eric Kwok：「題材特別，有一晚跟林寶食飯，他說起讀書時識得有朋友，圍埋一齊賭錢時出千，被人捉到後就喺度『Heh heh heh』，當冇事發生。我覺得好多人都是這種態度，例如的士司機兜路，或者排隊打尖，被人捉到都是當冇事，這首歌就是講這種事。」
〈鐘樓駝俠〉
曲：Eric Kwok / Jerald 詞：林若寧
Jerald：「鐘樓駝俠在鐘樓內不問世事，但好討厭『滴答滴答』的聲音，因為他不想過那種到幾點就要做甚麼，被時間概念困擾的生活。我發覺很多人鍾意睇鐘食飯，他們會望望手表，然後就：『咦，肚餓啦喎。』點解要望表先至覺得肚餓呢？其實是被時間控制了自己的生活。」
〈魚蝦蟹〉
曲：Eric Kwok / Jerald 詞：林夕
Eric Kwok：「大海2、30年後就會沒有魚，因為會被人吃光，靈感來自documentary《The End of the Line》，睇完後很震撼，雖然污染也是原因之一，但人類的食量才是主因。」
〈So Say We All〉
曲：Eric Kwok / Jerald 詞：林寶
Jerald：「好慘的一首歌，這句『so say we all』是來自美國電視劇《Battlestar Galactica》，這套劇集好深奧，好heavy，講僅餘的人類在負隅頑抗，每次絕望的時候，將軍就會出來講一句『so say we all』。歌曲是講就算戰至最後一兵一卒，我們都會堅持到底。」a
專輯內附數首歌曲的MV。
《武當》封套。
